Sicilia:
biddizza senza tempu;
terra di focu
ca chianci vilenu.
‘U so ciatu di sirena
tanti populi ‘ncantà:
‘i greci e ‘i bizantini,
‘i turchi e li romani
ca sbarcarunu
lli porti
doppu tantu navigari.
Arti, cultura,
guerri e funirali:
chiantu di picciliddi,
sciauru di mari.
Sicilia:
luci assutata;
rosa di minnitta senza spini.
Ccu la fami
e la miseria
‘i mafiusi
‘n doppiu pettu
s’accattavanu la genti,
si sintivanu putenti.
Omini onesti
ammazzati pi la strata
p’assutaricci la vucca
ca punci comu spata.
(dormi, dormi
sposa maiulina:
specchiu ‘ncantatu
adduma ‘a matina).
Sicilia:
terra di nuddu,
scola chiujiuta:
gridu di matri
pi la morti di li figli
ca nuddu ascuta.
‘I catini di la storia
s’abbrazzanu,
si parlanu:
tempu a lu tempu,
vuci a la vuci.
C’è cu cridi!
C’è cu spera!
primavera
ca s’abbenta:
ventu di sciroccu
ca scjiuscia
quann’è sira.
Sicilia:
perla di lu munnu;
favula ‘ntica
d’amuri
e di sangu.